Refugjatët nuk e njohin të nesërmen e tyre
nuk e dinë se çfarë i pret
ata janë pa të nesërme
se Europa është bërë një oqean i trazuar përpirës
që ua mbyt anijen e shpresave
Refugjatët nuk kanë të drejtë të kenë ëndërra
ata i shkulin ëndërrat nga shpirti
ditën që i çrrënjosin nga shtëpitë e tyre
e i detyrojnë të marrin ikën
me fëmijët në krahë
që rriten e bëhen burra dhe gra menjëherë
brënda natës
sa ndeshen me sytë e akullta të Europës
dhe shpirtin e saj prej telesh me gjemba
Refugjatët janë pa të nesërme
sipas verdiktit të qytetërimit
më të qytetëruar të botës
që lirinë e ka kthyer në tatuazh të vetin
të paprekshëm nga vargjet kilometrikë
të refugjatëve
si vargjet e hebrejve në kohën e djallit
Refugjatët nuk e dinë të nesërmen
asnjë fallxhor nuk ua lexon dot
vijat e fatit në duart e tyre
të ngritura lart
në lutjen që bie në veshë të shurdhër
refugjatët ecin drejt të panjohurës të frikëshme
kur nga rruga shohin veç rrokaqiej
pa dritare dhe dyer
ku ata nuk kanë se ku të trokasin
dhe dikush t’ua hapë derën e t’u thotë
“mirë se vini”
fjala “mirë se vini” është shuar
nga fjalorët e gjuhëve të Europës
ditën që barbarët
i shkulën nga vatrat e tyre
e ata morën ikën nëpër rrugët e botës
me fëmijët në krahë
që vuajnë me miliona
trupa e shpirtëra
si Krishti i kryqëzuar
në mileniumin e tretë
pas erës së re…
Comentários